जनकपुरधाम
“दिगो विकास लक्ष्य प्राप्तिका लागी सहकारी” मुल नाराका साथमा आफनो ११औ वार्षिक साधारणसभा आज मंगलबार सम्पन्न गरेको छ ।
जिल्ला बचत तथा ऋण सहकारी संघ लि.धनुषाका अध्यक्ष एवम् राष्ट्रिय सहकारी बैंकका संचालक धु्रव नारायण यादवको अध्यक्षतामा भएको सो कार्यक्रममा प्रमुख अतिथि प्रदेश २ का भूमि व्यवस्था तथा सहकारी मन्त्री शैलेन्द साहले प्रदेश सरकार सहकारी संस्थासँग सहकार्य गरेर अगाडि बढ्न तयार रहेको बताएका छन् ।
वार्षिक साधारण सभामा मन्त्री साहले प्रदेश २ को आठवटै जिल्लामा कोल्ड स्टोर निर्माण गर्न लागेको छ , ती मध्ये सप्तरी र सर्लाहीमा सहकारी मार्फत नै निर्माण गर्न लागेको बताएका छन् ।
साधारण सभाका प्रमुख अतिथि समेत रहेको मन्त्री साहले सहकारी संस्थाहरु ऋण तथा बचतको कार्य गर्दै आएकोछ, तर प्रदेशको योजना यो छ कि सहकारी अब उत्पादनको क्षेत्रमा पनि शस्क्तरुपमा कार्य गरोस् । उनले भने, ‘ प्रदेश सरकारद्वारा सानासाना उद्योग धन्धा सञ्चालन गर्ने लक्ष्य छ । त्यो उद्योग पनि सहकारी मार्फत सञ्चालन होस् लक्ष्य लिएको छ ।’
प्रदेश स्तरीय एउटा बलियो सहकारी होस् जसले सहकारी विभागको राम्रो नेतृत्व गरोस् तर आठवटा जिल्ला मध्ये कुनै पनि जिल्लामा सहकारी संघ व्यवस्थित हुन नसक्दा चिन्ताको विषय रहेको उनले भने ।
संघको ११ औ वार्षिक साधारण सभाका अध्यक्ष ध्रुबनारायण यादवले सामाजमा उत्कृष्ट कार्य गर्ने स्वर्गद्वारका निर्माता समाजसेवि पवन सिंघानियालाई दोसल्ला ओढाएर सम्मानका साथै नगद २५ हजार रकम समेत दिएका छन् ।
कार्यक्रममा प्रदेश सांसद रामअशिष यादव , परमेश्वर साह , जिल्ला बचत तथा ऋण सहकारी संघ लि.धनुषाका सचिव संजय साह , जसपाका युवा नेता तथा सहकारीकर्मी सिताराम यादव , राष्ट्रिय सहकारी बैंकका शाखा प्रमुख विष्णु पराजुली , डिभिजन सहकारी कार्यालय जनकपुरका पुर्व प्रमुख परमेश्वर यादव , नेपाली कांग्रेस धनुषा सचिव विशेश्वर यादव , नेपाल प्रेस युनियन धनुषा अध्यक्ष राजन सिंह , नेवि संघका नेता संजिव यादव लोकहित बचत तथा ऋण सहकारी संस्थाका अध्यक्ष प्रमोद कुमार छिटटान लगायतका व्यक्तिहरुले आफ्ना धारणा राखेका छन् ।
