ज्वेलर्सबाट चोरी गर्ने २ पक्राउ

जनकपुरधाम,भादौं १९ गते
धनुषाको एक सुनचांदी पसलबाट चोरी गर्ने २ पक्राउ परेको छ । धनुषाको दल्केवर स्थित गणेश लक्ष्मी ज्वेलर्समा दिनदहाडै चांदीको गरगहना चोरी गर्ने २ जना पक्राउ परेका छन् । गहना चोरी घटनामा संलग्न रहेको आरोपमा प्रहरीले शनिबार धनुषाको धनुषाधाम नगरपालिका –८ का टक्कर बहादुर मगराति मगर र चोरी गरेको गहना किन्ने जिल्लाको मिथिला नगरपालिका –४ पुष्पवलपुरकी ३५ वर्षीय सुरेखा देवी यादव रहेका छन् । मिथिला नगरपालिका –६ ढल्केबरस्थित स्थानीय शिवजी साहको गणेशलक्ष्मी ज्वेलर्सबाट शुक्रबार बिहान ९ बजेको समयमा सुनचाँदीको गरगहना चोरी भएको इलाका प्रहरी कार्यालय ढल्केवरका प्रहरी निरीक्षक प्रदिप सुवेदीले जानकारी दिए । पक्राउ परेका मगरको साथबाट ७ तोला सुनचाँदी गरगहना बरामद भएको सुवेदीले बताए । त्यस्तै चोरी गरेको गरगहना खरिद गरेको आरोपमा सुरेखालाई समेत पक्राउ गरेको छ । उनले चोरी गर्ने मगरबाट ५ तोला सुनचाँदी गरगहना सुरेखाले खरिद गरेको कारण उनलाई पनि प्रहरीले नियन्त्रणमा लिएको हो । सुवेदीका अनुसार पक्राउ परेका दुवैजनाको साथबाट जम्मा १२ तोला चाँदीको गरगहना बरामद भएको हो । पसल सञ्चालकको भनाइलाई उद्त गर्दै प्रहरी निरीक्षक सुवेदीले पसलबाट ४८ तोला चाँदी चोरी भएको जानकारी दिए । घटनाबारे थप अनुसन्धान भइरहेको इलाका प्रहरी कार्यालय ढल्केवरले जनाएको छ । यता ज्वेलर्स सञ्चालक शिवजी साहले आफ्नो पसलबाट ६ सय ग्राम चाँदीको गरगहना चोरी भएको बताएका छन् ।