जनकपुरधाम, असोज २ गते ।
नेकपा (एस)की केन्द्रीय सदस्य रामकुमारी झाँक्रीले ७ महिनापछि एमाले भत्किने दावी गरेकी छन् । समाजवादी प्रेस संगठनले शनिबार जनकपुरधाममा आयोजना गरेको पत्रकार सम्मेलनमा बोल्दै नेतृ झाँक्रीले अब हुने प्रतिनिधिसभा र प्रदेशसभा निर्वाचनमा एमाले भत्किएर जाने दावी गरिन् ।
उनले केपी शर्मा ओली सच्चिने कुनै सम्भावना नरहेकोले ओलीकै कार्यकर्ताहरु उनको साथ छोड्ने बताइन् । उनले भनिन् ‘कुनै चिज बिग्रेपछि काम लाग्दैन्, ओली सच्चिने कुनै सम्भावना छैन् त्यसकारण कुनै सम्भावना नै नभएको घरमा बस्नु भन्दा समयमै त्यहाँबाट छोडेर यो आन्दोलनमा समाहित हुनु सबैका लागि हितकर हुनेछ ।’
संगठन निर्माणको क्रममा विद्रोहको प्रक्रियालाई संगठित गर्ने अभियान चलेको बताउँदै उनले सयौं नेताहरू एकीकृत समाजवादी पार्टीमा आउन चाहिरहेको जिकिर समेत गरिन् ।
नेकपा एमालेको नेतृत्वमा अवसरवाद, व्यक्तिवाद, नातावाद, विसर्जनवाद, दक्षिणपन्थी हावी भई पार्टी सच्चिनै नसक्ने अवस्थामा गएपछि आफूहरुले विद्रोह गरेको नेतृ झाँक्रीले बताईन् । दुई तिहाई बहुमतको तत्कालिन सरकारलाई सोही ढंगले सञ्चालन गर्न नसकेर त्यसको बदलामा मध्यावधि निर्वाचनको माग गर्दै दुई दुई पटक संसद विघटन गर्ने जस्तो गैरजिम्मेवार, असंवैधानिक र अपराध गर्ने काम गरिएको आरोप लगाउँदै नेतु झाँक्रीले आफूहरुले गरेको विद्रोह संविधानको रक्षाको लागि लोकतन्त्रलाई प्रवद्र्धन गर्दै संसदलाई पूर्ण कार्यकाल सञ्चालन गर्नका निम्ति रहेको धारणा राखिन ।
उनले युवा पुस्तामा एकीकृत समाजवादी पार्टीको बढ्दो आकर्षण रहेको र समाजवादतर्फको यात्रामा आफूहरु अगाडि बढ्छौं भन्ने संकल्पलाई धेरै साथ र सहयोग भेटिरहेको दावी समेत गरिन् ।
यदि केपी ओलीलाई हामीबाट धक्का लागेको छैन् भने उनले हाम्रो बाटो किन छेकी राख्नुभएको छ ? उनले प्रश्न गरिन् ।
उनले भनिन्, ‘केपी ओलीको दक्षिणपन्थको विरुद्ध विद्रोहको सानो झिल्को हो । अहिले सलाई मात्रै कोरिएको हो । बिस्तारै धेरै ठुलो डढेलो लागेर सत्यानाश गर्नेवाला छ । उहाँ धेरै हतास मनस्थितीमा हुनुहुन्छ ।’
Discussion about this post